गाउँ खाने कथा हैन, देश खाने कथा

प्रकाशित मिति: २९ फाल्गुन २०७६, बिहीबार ०९:३१

 

 

-संप्रस पौडेल, हेटौंडा         

प्रश्न:
शौचालयदेखि मन्दिरसम्म
पाउँछ यसले अनुमति,
शिरानीमै सुत्न पाउँछ
काम पनि कति कति ।
के हो ?

मजदूरदेखि सचिवसम्म
गोजी गोजीमा बस्दछ,
हुलदङ्गा भीड जहाँ होस्
सोध्दै नसोधी पस्दछ ।
ककुन चिज हो ?

कस्तो बेला बनाएछन्
यसलाई मार्टिन कुपरले,
सबै यसमै अटिगो
सुख पायो खप्परले ।
के हो ?

‘साइलेन्स’ लेखिएको ठाउँमा
पहिल्यै यो कराउँछ,
खुबै जतन गरेको चिज
छिनको छिनै हराउँछ ।
कुन चिज हो ?

फोटै खिच्न अघि सर्छ
जोसुकै हुन् भयभित ।
मन्दिरमा देउताका पनि
मुख चुच्चो भ‌ए कि त ?
केलाई भनिएको हो ?

आगो लाग्दैछ घरमा
फेसबुक लाइभमा रमाउँछ,
आँशु बेची युट्यूबमा
आफू पैसा कमाउँछ ।

उत्तर:
मोबाइल हो त्यो चिज
साथमै राख्छन् गर्छन् रीस
दिनरात सुख छैन
कहिले पिस कहिले किस ।

चिता दन्दनी बलिराछ
दाह्रा ङिच्याई सेल्फी लिन्छ,
जुगमै नभेट्ने मान्छे पनि
फेसबुक फ्रेण्डमा यसले चिन्छ ।

समय बर्बाद भैरहेछ
गरीब मुलुकमा पैसाको खति,
गिट्ठाको बीऊ रोपेर
केका फल्थ्यो र कागती ?

जसलाई दुई छाकै टार्न गाह्रो
उसकै छ ३० हजारको फोन,
कुपोषणले जो गलित छ
बोक्छ लाखौँको आइफोन ।

सकिन्न है रोक्न यसलाई
उँभो यो चढ्यो चढ्यो,
म्याराथनमै छ मोबाइल
झनै अघी बढ्यो बढ्यो ।

प्रतिक्रिया दिनुहोस्

श्री गजुरियल गार्डेन प्रा . लि  

© 2018 All Right Reserved Gajureal.com
सूचना विभागमा दर्ता नं. : 906/075-76 || Designed BY appharu.com