प्रकाशित मिति: 5 February, 2021 10:17 am

“यो अन्तिम युद्ध हो,
आ-आफ्ना ठाउँमा डटौँ !
यो अन्तिम युद्ध हो,
आ-आफ्ना ठाउँमा डटौँ !
यो अन्तिम युद्ध हो,
आ-आफ्ना ठाउँमा डटौँ’…..!”

यही गीत गाउँदा गाउँदै,
मेरा बुबा ढले,
यही संगीत सुन्दासुन्दै,
मेरा दाजु गले !
बहिनी मरिन्,
दिदी थला परिन्,
भाइ सिद्धियो,
म पनि रित्तिएँ !

तर,
न युद्ध ‘अन्तिम’ भयो,
न देश शान्तीतिर गयो,
हरेक पटक झेल भयो,
मुसो-बिरालो खेल भयो !

अनि कसरी भनौं नयाँ पुस्तालाई ?
‘जाउ बाबू, देशको मुहार फेर्न
सबैजना एक भएर जुटौं,
आउ नानी, यो अन्तिम युद्ध हो
आ-आफ्ना ठाउँमा डटाैँ …!?’